SEGUIR ADIANTE

Ola a todos e todas de novo. 

Esperamos que tiverades un Nadal marabilloso. Nós retomando folgos para este novo ano o 2025, que é moi especial para a nosa asociación xa que o 19 de decembro fai 25 anos que naceu Sarela, agora Dano Cerebral Santiago de Compostela. Non puidemos celebrar o XX aniversario por mor da pandemia mundial pola COVID-19 co que este ano imos a a tirar a casa pola ventá e tentaremos dar visibilidade ao colectivo do DCA.

Na entrada de hoxe queremos solidarizarnos cunha enfermidade que por desgracia é tamén moi común no noso colectivo, a depresión, que o 13 de xaneiro celebrou o seu día. Ademais consideramos que as persoas que a sofren son estigmatizadas como tamén nos pode suceder a nós.

O DCA implica un cambio de vida radical, o cal non queda máis remedio que asumir, tanto nós como a xente que nos rodea, facendo fincapé na familia máis directa. Como dicimos sempre, o DCA é un tsunami. Isto require moitísimas adaptacións na nosa vida e na da nosa familia. Moitas veces sentímonos mal  por non ser quen de facer cousas que antes podiamos facer o que provoca a sobrecarga de quen nos coida. Ser conscientes de que non volveremos a ser mesma persoa, e que somos dependentes, pode chegar a provocar que caiamos en depresión e en sentimentos de frustración.

Nós, como colectivo do DCA, sabemos este que tsunami podería levarse mellor se:

- Hai un trato máis humano nos recursos públicos: hospitais, centros de saúde, administración, etc.

- Compartimos as nosas vivencias con xente que pasou polo mesmo. 

- Temos máis información sobre os recursos para persoas con discapacidade en xeral e con DCA en particular.

- Eliminamos barreiras arquitectónicas e cognitivas.

- Favorecemos que todas as persoas puideran utilizar o transporte público.

- Etc.

Todo isto faría que a  nosa vida fora un pouco máis digna e se podería evitar moita preocupación e ansiedade tanto en nós como na nosa familia e amigos.

 A Organización Mundial da  Saúde define a saúde como un estado de completo benestar físico, mental e social, e non soamente a ausencia de afeccións ou enfermidades, polo que coidar o noso benestar emocional é moi importante.

Na nosa entidade témolo moi  claro e contamos con catro psicólogas que nos axudan cada día a atoparnos mellor emocionalmente.

Grazas as catro, Rocío, Nerea, Ana e Sonia, e en especial a esta última porque é a que en SADT está pendente de nosa saúde mental xunto co resto de profesionais. 

"A depresión e a ansiedade son como unha tormenta interna que só ti podes ver pero ás veces compartila faina máis doado de levar".